He Tai Pari (Upoko Tuarua / Chapter Two)
Illustrations By Jenny Cooper and Translation By Kaharau Keogh
Sep 12 ● 15 min read ●
To read previous chapters go to Stories
Upoko Tuarua
Parahutihuti ana tā Emmy oma ki te waha o te kura, ka waiho mai a Ari ki tana puehu, ā, ka hemo ki tua o ngā akomanga. Kātahi anō ia kia timata i te kura, he hīkaka nōna ki te ako i ngā mahi o ia rā. Ka rongo a Ari i te tangi o te pōro e whakatata mai ana. I mua i tana kitenga atu i te pōro nei, ka tere peke ia, ā, ka tukiraea e ia te pōro. I te pōro e hoki atu ana ki te papa tākaro, ka arumia e Ari, ka mahue tana pēke ki te taha o te kōura, ā, ka tomo tōtika atu ki te tākaro poiwhana. Tōna hari kua whai wā ia ki te tākaro me ōna hoa i mua i te timatanga o te kura.
I te tangihanga o te pere, ka hui katoa ngā tamariki nauhea ki ā rātou akomanga. I reira a Whaea Woods e tatari ana ki a Ari me ōna aropā. Ka owhaina rātou ki te mene a Whaea Woods i a rātou ka kuhu ana ki te akomanga. Ahakoa tō Ari tino hiahia ki te pakiri i ōna niho ki a Whaea Woods, kua waia kē ia ki te noho koropuku, nāreira ka tūpou a Ari, ka ahu tōtika atu ki tana tūru.
Ka tau te wairua o te akomanga, nā, ka timata ngā mahi o te rā, arā, ko te pāngarau, te tuhituhi me te pānui. Kua tae te wā mā te roopū o Ari te keemu pāngarau e tākaro. Heoi, kāhore i roa, ka tae te wā kia tahuri tana roopū ki te tūmahi tuhituhi. Tē aro i a Ari ngā tohutohu mō tēnei tūmahi, engari anō te toenga o te akomanga i mōhio. Ka timata tana ngaungau i tana pene hei whakatōroa i tana patu i a ia. I rongo ia i ngā karu o Whaea Woods e titikaha ana ki a ia. Ka muna a Ari, ka whātoro i ōna ringa ki te rangi me te mea nei kua mamae i tana kaha tuhituhi, kia kore ai a Whaea Woods e mōhio kahore anō ia kia timata.
Ka mutu ana te wā tina, ka whakamaumahara atu a Whaea Woods ki a Ari ki te tuku mai i tana uiuitanga mō tana aromatawai. Kāre anō ia kia paku timata i taua aromatawai, engari kāore a Whaea Woods i te mōhio ki tēnā. Heoi, hei tōna wā pea, ka riwha mai te kurahuna nei ki a ia. Me mutu te rūkahu a Ari ki a Whaea Woods i konei. Nā, ināianei kua timata te patapātaitia o tana aromatawai e tōna Māmā. Kua tae te wā kia haere atu a Ari ki te kite i tōna koroua, he mōhiotanga ōna mō ngā mea katoa. He puna whakaaro nui.
Nō muri iho mai i te kura, i tana hokinga ki te kāinga, i tū tuatahi ia ki te kāinga o tōna koroua. I tukuna he paparorohiko ki a ia kia pai tana hopu i ngā whakaaro ō Koro. Kāore ia mō te tuhi ki te pepa, kaua hoki i mua i te aroaro o Koro.
Koirā anō tētahi torohū āna: kāore e rata ana ki a ia te tuhituhi me te pānui i mua i te aroaro tangata, kāre i kō atu, kāre i kō mai i tēna.
Ka tae ia ki te tiriti o Koro, ka kite atu a Ari i te pakoko haere a ngā rau. Tae rawa ana a Ari ki te kāinga o Koro, ka tikina e ia ngā mēra i te pouaka, ā, ka hīkoi ki te kuaha ō-muri. Ka whiowhio atu a Ari i te tino waiata o Koro me te whakapae ka timata hoki te whiowhio o Koro i a ia ka whakatata ana. I ohorere katoa a Ari i tana kitenga atu i te kapi katoa ngā matapihi me ngā tatau, nā te mea, i te nuinga o te wā e tūwhera ana i ngā rā paki pēnei i tēnei. Ka peia e Ari te tatau, ka whakamātauhia te kakau, engari, i te raka katoa.
Te mōrearea hoki o tēnei āhuatanga ki a Ari. Tērā pea i haere mā raro a Koro ki te toa?
I tana putanga atu ki te rori, ka taupatupatu a Ari me ōna whakaaro. Ka tere āwangawanga ia mō tōna koroua. Pērā pea me kimi huarahi anō e kuhu ai ia ki te whare …
Ka hoki atu a Ari ki muri rawa o te whare, ka tū ki runga i te tino tūru o Koro, ā, ka tātare atu ki roto i te matapihi o te kīhini. Ka whakamōhitingia ōna whatu kia pai ai tana tirotiro haere.
Ka pakū mai tana rongo i tana ingoa e karangahia ana.
“Ari! Ari, tēnā, awhina mai!” te tē atu a Koro.
E kitea ana a Koro e Ari e tīraha ana i te papa o te kihini me tōna ringa e toro atu ana ki a ia.
“Taihoa e Koro! Māku koe e rauora!” te ūmere a Ari. Ka rere te kōihiihi ki roto i a Ari, ka pātukituki tōna manawa, ka whakaaweawe i ōna whakaaro. Māhea ia e kuhu atu ki te whare ki te awhi i a Koro.
“Kaua e māharahara, e tama,” te karanga a Koro. “Kei te pai tonu ahau, He matapihi rānei e kuhu ai koe ki roto? Kahore e taea e au te neke. Tirohia te takiwā, kimihia ngā taputapu e kuhu ai koe ki roto.”
I ngana a Ari ki te unu i tōna mataku. Koia kei a koe, e hoa! Tōna whakaaro ki a ia anō.
Ka tau te wairua o Ari, nā, ka timata tana mātai i te takiwā ki te kimi rauemi e uru atu ai ia ki te whare ki te awhi i a Koro.
I kitea e ia te matapihi wharepaku e tūwhera ana. Tērā pea, mā reira ia e kuhu atu ai. Ka whakamātauhia te matapihi rā, engari … Kāre i tutuki i a ia, nā tana poto rawa.
Ka hoki atu ia ki te hihira atu ki a Koro me te whakamōhio atu kei konei tonu ia e ngana ana ki te kuhu ki roto. E tīraha tonu ana a Koro.
Ka rere te mauri o Ari, me tana ngana kia kaua a roimata e rere i tōna kanohi.
Kātahi ōna mahara ka hoki ki taua tūru … Ka taea pea te kuhu ki te matapihi puare mā te whakamahi i te tūru! Ka kotahi ia ki te tiki i te tūru, ā, ka meingatia ki ngā rekereke o te matapihi. He māma noa iho tana mau ki te tauwharenga o te matapihi ināianei. Ka timata tana wete i ngā whakarawa, engari he kikī rawa! Kāore ia mō te paku ō ki taua matapihi rā. Ka rere anō tōna mauri.
Ka nihini anō mai ngā roiamata, engari i tohe ia kia kore rawa rātou e paheke.
E whakapono ana ia, pēnā he huriwiri tāna, ka taea noatia e ia taua whakarawa te wete, taua matapihi te kuhu. Ka hoki anō ia ki te hihira atu ki a Koro me te whakamōhio kua tata kuhu ia ināianei. Kāore a Koro i whakahoki kōrero mai. Ka kotahi atu a Ari ki te matapihi rā me te mōhio me tere uru atu ia ki te whare. Me pao rānei i te matapihi kia tere ake ai taku uru? Te whakaaro a Ari. Engari ka motua pea ia e ngā hawanga karāhe.
Ka mahara a Ari mō ngā kōrero o Koro i mua ake rā: “Tirohia te takiwā, kimihia ngā taputapu e kuhu ai koe ki roto.”
He taputapu rānei kei te takiwā nei?
Te waka o Koro!
Ka tere atu ia ki te waka, ka tīhaea te kuaha kia puare, ka hikina te uhi mō te wīra wātea. Arā! I kitea he hikiwaka, he māripi … me tētahi huriwiri!
Ka hoki tere atu ia ki te matapihi rā, ka toro atu i tōna ringa e mau nei te huriwiri, ā, ka mau ki te whakarawa. Nā te kikī, i mau tonu te whakarawa, kāore i tākiri. Tāria te wā, ka tangatanga mai te whakarawa, ka wetekina e Ari, nā, ka tuku ki te papa o te wharepaku.
Ka piki, ka kake ake a Ari ki te tauwharenga o te matapihi. Ka uea ake tōna tinana ki roto me te whakapono ka kore ia e tau ki roto tonu i te wharepaku. Ka peke, ka tau ki roto!
Ka oma atu ia ki a Koro, ka tūturi ki tōna taha, ā, ka mea: “Kei konei au, e Koro. Me aha aha ināianei?”
“Kātahi te tamaiti autaia ko koe! Me waea pea ki te waka tūroro. Kei te tēpu taku waea pūkoro. Tēnā koa, tikina atu he inu wai māku. Kua mau ahau ki te papa nei mō te rangi katoa.”
I paku hīkaka a Ari ki te waea atu ki te waka tūroro, me he hautipua ia. “Kātahi te tamaiti autaia ko koe!’ te kōrero o Koro.
“111, he pirihinama, he patu ahi, he waka tūroro rānei tō whai?” te kī ā te wahine.
“Waka tūroro!” te ūmere a Ari.
“Tukuna mai tō ingoa me te wāhi o te aituā.”
“Ko Ari McInnis tōku ingoa, kei Wai-iti Pei, 72 i te tiriti o Theodore.”
“Tēnā, tōaitia anōtia te wāhi. Kei Tāmaki-Makaurau mātou. Kāore e kitea ana te wāhi e a mātou rorohiko.”
Ka tutū te manawa o Ari. He aha ia i kore ai i mōhio ki te whakahua i te ingoa o te tiriti? he aha hoki i kore ai te rorohiko e mōhio ki te wāhi nei?
“Ahhhh … T … T-H … T-H …”
Ka pakaru mai te werawera i te rae o Ari. Ka titiro atu a Koro ki a ia. Kātahi te autaia ko au. Kāore e taea e au te waka tūroro te tiki. Te whakaaro a Ari.
“Homai te waea, e tama.”
Ka tupou a Ari, ka tukuna te waea ki a Koro.
“Tēnā koe e kō. Āe, T-H-E-O-D-O-R-E. Kei te mauri rere noa iho te tama nei, ki tōku mōhio. Kua hē āna rā. Āe, kei te koutu o Bank. Kua whara ahau, tē taea te ara. Kua whati pea tōku ringa, kua whara hoki pea tōku hope hapehape. Āe, ka tatari tōku hoa ki a koutou. Hei konā!” Ka whakamoea e Koro te waea.
Ka whero katoa te kanohi a Ari i te whakamā. Kāore ia i hiahia ki te titiro atu ki a Koro.
“E pēhea ana te inu wai nā, e taku tama?” Te pātai o Koro. “Ka mutu ana tēnā, huakina te tatau ka whanga ki te waka tūroro ki te taha o te rori. Ka haere mai koe ki tōku taha, nērā, e tama?”
“Āna! Kāore e kore.”
Ka tikina e Ari te inu wai, ā, ka whakatika i te noho o Koro me te ngana kia kaua ia e mamae. Ka kuha a Koro, ka inumia te wai.
“Me kore ahau i a koe, e tama. Oma atu ki waho. Kei te rongo au i te waka tūroro e tangi mai ana.”
Ka huakina te tatau e Ari, ka whakamaua te kuaha ki te hū o Koro. Ka rangona a Koro e waea atu ana ki te whakamōhio ki a Māmā.
Ka whakatata mai te tangi whakatūpato ā te waka tūroro.
Are you a professional or budding writer and want to contribute with a story? We would love to have you on board!